Сурагч: Дүүргийн шүдний эмнэлэг ломбоны багаж байхгүй, эмчилгээ хийхгүй гэсэн

Хүүхдийн төлөө мэдээлнэ уриатай Child.mn сайтын "Мэргэжилтний үг" буланд Баянгол дүүргийн Өсвөрийн сэтгүүлчдийн клубээс өөрсдийн бичсэн материалыг ирүүлснийг уншигч танд хүргэж байна.

Хүүхдийн эрүүл мэнд бол гэр бүл, нийгмийн ирээдүйг тодорхойлогч хамгийн чухал үнэт зүйлсийн нэг билээ. Монгол Улсад хүүхдийн эмнэлгийн тусламж үйлчилгээ авах боломж тодорхой хэмжээнд бүрдсэн боловч бодит амьдрал дээр олон хүндрэл, ялгаа оршсоор байна.

Улсын эмнэлгүүдэд үнэ төлбөргүй болон хөнгөлөлттэй үйлчилгээ авах боломжтой нь олон гэр бүлд том дэмжлэг болдог ч тоног төхөөрөмж, материалын хүрэлцээ, эмч нарын ачаалал өндөр байдал зэрэг шалтгаанаас болж үйлчилгээний чанар, хүртээмж хязгаарлагдмал байдаг. Зарим тохиолдолд энгийн үзлэг, шүдний ломбо хийх зэрэг анхан шатны үйлчилгээ хүртэл багаж, материал дутсанаас болж хийгдэхгүй байх нь бий. Би өөрөө нэг удаа дүүргийнхээ шүдний эмнэлэгт очиход эмч нар "Шаардлагатай ломбо хийх багажгүй учир эмчилгээ хийгдэх боломжгүй" гэж хэлсэн тул эцэг эхээсээ мөнгө авч, хувийн эмнэлэгт очиж эмчлүүлэхээс өөр аргагүй болж байсан. Энэ бол зөвхөн нэг хүүхдэд тулгарч буй бэрхшээл биш олон хүүхдэд ийм асуудал тохиолдож байгаа юм.

Хувийн эмнэлгүүдийн хувьд тоног төхөөрөмж, үйлчилгээний чанар харьцангуй сайн, үзлэгийн цаг авахад хурдан, заримдаа хүүхдэд ээлтэй орчин бүрдүүлсэн байдаг ч өртөг өндөр тул бүх гэр бүлд хүртээмжтэй биш. Амьжиргааны түвшин доогуур өрхийн хувьд хувийн эмнэлэгт хандах нь бараг боломжгүй сонголт болж үлддэг. Үүнээс улбаалан хүүхдийн өвчин хүндрэх, шаардлагатай эмчилгээгээ цаг тухайд нь хийлгэж чадахгүй байх тохиолдол олон гардаг.

Нийслэлийн хүүхдүүдийн хувьд сонголт арай илүү байдаг бол орон нутагт нөхцөл байдал илүү хүндрэлтэй байна. Тэнд эмчийн хүрэлцээ, оншилогооны тоног төхөөрөмж дутмаг, заримдаа энгийн лабораторийн шинжилгээг ч хийх боломжгүй байдгаас өвчнийг хожуу үед нь оношлох, эмчилгээ тасалдах эрсдэл өндөр. Энэ ялгааг арилгахын тулд улсын хэмжээнд урьдчилан сэргийлэх үзлэгийг тогтмолжуулах, хөдөлгөөнт эмнэлгийн багийг ажиллуулах, зайнаас үзлэг хийх үйлчилгээг хөгжүүлэх зэрэг арга хэмжээ нэн шаардлагатай байна.

Хүүхдийн эрүүл мэнд бол зөвхөн тухайн гэр бүлийн асуудал биш, бүхэл бүтэн нийгмийн ирээдүйтэй холбоотой томоохон асуудал юм. Тиймээс эмнэлгийн үйлчилгээний хүртээмжийг нэмэгдүүлэх, тоног төхөөрөмжийн шинэчлэл хийх, хувийн хэвшилтэй хамтран ажиллах, орон нутагт хүртээмжийг сайжруулах зэрэг бодлогыг бодитой хэрэгжүүлэх нь зайлшгүй чухал байна. Эрүүл хүүхэд бол эрүүл Монголын баталгаа бөгөөд энэ бол өнөөдөр гаргах хамгийн чухал хөрөнгө оруулалт юм.

Баянгол дүүргийн Өсвөрийн сэтгүүлчдийн клуб